ദേശീയപാതകളിലെ ടോൾ പ്ലാസകളിലൂടെയുള്ള യാത്ര എളുപ്പമാക്കിയ ഫാസ്‌ടാഗ് ഉപയോക്താക്കൾക്കായി പുതിയൊരു സൗകര്യവുമായി അധികൃതർ രംഗത്ത്. ഫാസ്‌ടാഗ് സേവനങ്ങൾ നൽകുന്ന ബാങ്ക് മാറ്റണമെങ്കിൽ പുതിയ സ്റ്റിക്കർ വാങ്ങി ഒട്ടിക്കേണ്ടിയിരുന്ന ബുദ്ധിമുട്ടുകൾക്ക് പരിഹാരമായി ‘വൺടാഗ്’ സംവിധാനം അവതരിപ്പിച്ചു. മൊബൈൽ നമ്പർ പോർട്ടബിലിറ്റിക്ക് സമാനമായി, വാഹനത്തിന്റെ വിൻഡ്‌ഷീൽഡിൽ പതിപ്പിച്ചിരിക്കുന്ന പഴയ ഫാസ്‌ടാഗ് സ്റ്റിക്കറും ടാഗ് ഐഡന്റിറ്റിയും മാറ്റാതെ തന്നെ മറ്റൊരു ബാങ്കിലേക്ക് അക്കൗണ്ട് പോർട്ട് ചെയ്യാൻ ഈ സംവിധാനത്തിലൂടെ സാധിക്കും.

വൺടാഗ് നിലവിൽ വരുന്നതോടെ ഉപയോക്താക്കൾക്ക് നിരവധി അനുകൂല്യങ്ങളാണ് ലഭിക്കുന്നത്. ബാങ്ക് മാറുമ്പോൾ പഴയ സ്റ്റിക്കർ നീക്കം ചെയ്യേണ്ടതോ പുതിയ ഫാസ്‌ടാഗിനായി അപേക്ഷിക്കേണ്ടതോ ആയ സാഹചര്യം ഒഴിവാകുന്നു. നാഷണൽ ഹൈവേ അതോറിറ്റിയുടെ ‘രാജ്മാർഗ് യാത്രാ’ ആപ്പ് വഴിയാണ് ഉപയോക്താക്കൾക്ക് ഈ സേവനം ഉപയോഗപ്പെടുത്താൻ സാധിക്കുന്നത്. ടോൾ പേയ്‌മെന്റുകൾ പതിവുപോലെ എൻഇടിസി സംവിധാനത്തിലൂടെ തന്നെ സുഗമമായി പ്രോസസ് ചെയ്യുമെന്നതിനാൽ ടോൾ പ്ലാസകളിലെ പ്രവർത്തനങ്ങളിൽ യാതൊരു തടസ്സവും ഉണ്ടാകില്ല.

എങ്കിലും ബാങ്ക് മാറുന്ന വേളയിൽ ഉപയോക്താക്കൾ ചില പ്രധാന കാര്യങ്ങൾ ശ്രദ്ധിക്കേണ്ടതുണ്ട്. അക്കൗണ്ട് മാറ്റുമ്പോൾ പഴയ ഫാസ്‌ടാഗ് വാലറ്റിൽ ബാക്കിയുള്ള തുക പുതിയ ബാങ്കിലേക്ക് സ്വയമേവ കൈമാറ്റം ചെയ്യപ്പെടില്ല. പഴയ ബാങ്കിന്റെ കൈവശമുള്ള ബാലൻസും തീർപ്പാക്കാത്ത ഇടപാടുകളും ആ ബാങ്ക് തന്നെയാകും പിന്നീട് തീർപ്പാക്കുക. അതിനാൽ മറ്റ് ബാങ്കിലേക്ക് മാറുന്നതിന് മുൻപ് പഴയ ഫാസ്‌ടാഗിലെ ബാലൻസ് പരിശോധിക്കുന്നത് നന്നായിരിക്കും.

നിലവിലെ ബാങ്കിന്റെ സേവനങ്ങളിൽ അതൃപ്തിയുള്ളവർക്ക് വളരെ എളുപ്പത്തിൽ മറ്റൊരു ബാങ്കിന്റെ സേവനങ്ങൾ തേടാൻ വൺടാഗ് ഏറെ സഹായിക്കും. പോർട്ടബിലിറ്റി നടപടികൾ പൂർത്തിയാകുന്നതോടെ ഫാസ്‌ടാഗ് അക്കൗണ്ടുമായി ബന്ധപ്പെട്ട മുഴുവൻ മാനേജ്‌മെന്റും സേവനങ്ങളും പുതിയ ബാങ്ക് ഔദ്യോഗികമായി ഏറ്റെടുക്കും. വാഹനയാത്രക്കാർക്ക് ഏറെ ഉപകാരപ്രദമായ ഈ പുതിയ പരിഷ്കാരം ഫാസ്‌ടാഗ് സേവനങ്ങൾ കൂടുതൽ സുതാര്യവും ലളിതവുമാക്കുമെന്നാണ് വിലയിരുത്തപ്പെടുന്നത്.